നിശബ്ദം

എനിക്കും നിനക്കും
ഇടയില്‍
നമ്മളെന്നോ
നിശബ്ദതയുടെ
വിത്തുകള്‍ പാകിയിരുന്നു
വളർന്നു പന്തലിച്ച
അതിന്റെ നിഴൽ
ഇന്നു
നമ്മെ വിഴുങ്ങുന്നു

സിഗററ്റ്

നിന്റെ ചുംബനങ്ങൾ
പലപ്പോഴുമെന്ന
പൊള്ളിച്ചിട്ടുണ്ട്
ആരും അറിയാത്ത
ഇടവഴികളിലും
കോളേജിന്റെ ഒഴിഞ്ഞ കോണിലും വച്ച് ഞാന്‍ നിന്നെ
അല്ല
നീയെന്നെ സ്വന്തമാക്കിയിട്ടുണ്ട്
എന്റെ സുഹൃത്തുക്കള്‍
എന്നോട് പറഞ്ഞു
ഞാന്‍ നിന്റെ അടിമയാണെന്ന്
നിനക്കായി ഞാന്‍ അതും സഹിച്ചു
നീ എന്നോടൊപ്പം എന്നുമുണ്ടാകുമെന്ന് പറഞ്ഞു
വാക്കു തെറ്റിച്ചത് ഞാനാണ്
എന്റെ വീട്ടില്‍ അറിഞ്ഞപ്പോള്‍
അമ്മ എന്നെ കണ്ണുനീരിൽ
മുക്കിയപ്പോൾ
ഞാന്‍ നിന്നെ
നിർദ്ദയം കൈവിട്ടു
നിന്റെ പിൻവിളികൾ ഞാന്‍
കേട്ടില്ല
നാം അകന്നു  അകലങ്ങളിലേക്ക്
പ്രിയേ
നീ പോയപ്പോള്‍
എന്റെ പകുതി പ്രാണനും കൊണ്ടാണ്
പോയത്

പ്രണയത്തിന്റെ നിറം

ഒരിക്കല്‍
അവള്‍ എന്നോട് ചോദിച്ചു
എന്താണ് പ്രണയത്തിന്റെ
നിറമെന്ന്
അറിയില്ല എന്ന
മറുപടിയില്‍
എന്റെ തലയ്ക്ക്
കിഴുക്കി അവള്‍ പറഞ്ഞു
"മണ്ടാ അത് ചോപ്പാ"
പക്ഷേ എന്റെ
പ്രണയത്തിന്റെ നിറം
പച്ചയായിരുന്നു
നീ അകലുമ്പോൾ മാത്രം
തെളിഞ്ഞു വന്ന
അക്കര പച്ച

ഓർമ്മപ്പെടുത്തൽ

എന്നെ കുറിച്ചുള്ള നിന്റെ
അവസാന ഓർമ്മയും
ചിതൽ തിന്നു തുടങ്ങുമ്പോള്‍
ഞാൻ മടങ്ങിയെത്തും

ഉണങ്ങി തുടങ്ങിയ മുറിവുകളിൽ
എന്റെ വിയർപ്പുപ്പിറ്റിച്ച്
നിന്റെ നാഡീവ്യൂഹങ്ങളിലേക്ക്

ഞാനെന്ന തരിപ്പ് പടർത്തും